«МЕКТЕПТЕРГЕ КҮН ЭНЕРГИЯСЫ» ЖОБАСЫ

Бұл жобаның мақсаты – республиканың 5 мектебінде жаңартылатын энергияның шағын қуатты жүйесін құруға арналған бірегей платформа жасау. Жоба бірнеше өзекті мәселені шешуді көздейді: жас буынның жаратылыстану ғылымдарына, технологияға, инновацияға және кәсіпкерлікке деген қызығушылығын арттыру, Қазақстандағы энергетикалық ауысым туралы білімдерін нығайту. Бұл бастама жергілікті компанияларды әр мектепке арналған фотоэлектр тақталарымен жабдықталған арнайы жүйелерді «толыққанды» жобалау, сатып алу және салу жұмыстарына тартуға да ерекше мән береді. Сонымен қатар, компания осы жоба аясында елдегі жасөспірімдерді энергетикалық ауысым мәселелерін зерттеуге ынталандыру және олардың энерготиімді ойлауын қалыптастыруға септігін тигізу үшін оқушыларға және мұғалімдерге арналған арнайы «Шелл NXplorers» бағдарламасын ұйымдастырады.

«Мектептерге күн энергиясы» жобасы Қазақстанның 5 қаласындағы «Назарбаев зияткерлік мектептері» базасында іске асырылуда, олар: Астана, Орал, Атырау, Ақтау және Түркістан. Фотоэлектр тақталарынан құралған жүйелер аталған мектептердің қажеттіліктерін қанағаттандыру үшін арнайы жобаланған және әр мектепке 100 кВт энергия жасап шығаруға бағытталған. Бұл жүйелер мектептердің жылдық энергия тұтынымының 30%-на дейін қамтуға, коммуналдық қызметтерге жұмсалатын шығындарды қысқартуға, өндірілген энергияның артық бөлігін қала желілеріне бағыттауға, солайша энергияны едәуір үнемдеуге мүмкіндік береді.